佬訊先祝各位新年快樂，辛丑牛年吉祥！
上星期有讀者問道：
佬訊你好，我想問點樣著polo shirt先好睇？我有幾個friend著polo 會似青年才進/事業有成，但係我著上身就冇果種感覺，甚至有啲似校工同花王。
係因為係身形問題？因為佢哋係瘦到標準身形，而我就係肥。
如果要簡單回答的話，佬編會說：著淨色、盡量深色、剪裁要適中、條領要夠硬但不要太高、衫領衫袖衫尾一皺就買新的，完。肥仔著Polo，這些就是最合乎大眾審美觀的條件，這是第一個層次的答案。
「點樣著polo shirt先好睇」，也取決於你自己覺得點著先好睇。根據問題，你認為好睇的Polo，有以下兩個條件：1.似青年才進／事業有成；2. 瘦到標準身形。這樣的話，努力工作，勤力健身，that's it，這是第二個層次。
第三個層次，要再深入少少，將問題rephrase一下：「點樣你先會覺得自己著Polo shirt好睇。」Now that's interesting，因為好睇與否，其實全在一念之間。
情人眼裏出西施，所以首先要學會愛上自己。佬編知道有人會開始柴台叫回水，但這是個大學問。著衫時自信與否、舒服與否，比起你本身著成點更加重要。很多人著得好睇，卻渾身不自然，令旁人望到都覺得尷尬；有些人明明著得好普通，但氣場自在舒適，反而令人覺得好睇。
佬編不是叫你要盲目地自戀，真正的愛要真誠、包容、鼓勵。所以首先要做的，是直面自己的真心，盡量不要將問題歸咎在自己身型上。
點解你覺得自己似花王？因為件Polo shirt著了很多年開始變得又皺又霉，還是太鬆身？點解覺得朋友著得好睇？是因為件Polo熨得好直，還是因為隻袖夠短show到手臂？
當你對這些問題都有初步答案，第二步就去試衫，驗證自己的假設。著返窄少少是否好睇啲？件衫質料厚身一點又會否較好？關鍵是要當每次試衫都是一個data point，反覆驗證到底點先好睇。不要盡信試身室的鏡，有時電話自拍反而仲可信。
當經驗累積到一定程度，到時你自然知道點著先好睇；知道點著先好睇，你自然就會著得好睇。而如果不知道應該怎樣開始，不妨又回到第一步：著淨色、盡量深色、剪裁要適中、條領要夠硬但不要太高、衫領衫袖衫尾一皺就買新的。
F.