巴膠的愛，是難以理解的愛。難以理解的，唔係巴膠點解咁鍾意巴士，而是佢地愛巴士既方式。巴膠的愛，可能是一種毒撚的愛。
巴膠的狂熱行徑常人難以理解，但如果從一個毒撚的角度去看，可以解釋到巴膠的許多行為。
例如係位度扮揸巴士。唔知點解，只要係坐係前排，i mean學校課室同巴士車廂前排，就有機會係隔離睇到，一個扮揸巴士既巴膠。
右手在那空氣軚盤上抱月式扭軚，左手握著隱形波棍上又擼又搖，再加上用下盤運勁un下扮有座椅suspension system。這種只有毒撚才carry到的劇毒車長cosplay，精細detail得令人不安。
係街度追住巴士影，也十分常見。或者我哋可以換位思考，因為女神可遇不可求，良久的守候只能換來一瞬即逝的一面，巴膠用上街頭衝警盃的速度拼命追趕，也很值得體諒。
至於巴膠跑街發出的震撼性粗口，那叫愛之深，屌之切。有幾可我哋會見到毒撚係街度咁引人注目？要令到佢哋發聲，一定係佢哋真心在乎的事情。追巴屌人的聲音，是真正經過掙扎的聲音。沒有掙扎過的人生，並不值得過。
而偷巴士揸，也很順理成章。相對於追巴士影巴士，有甚麼比ㄧ親巴士香澤，更能令巴膠感到興奮？
其實巴膠的問題不在於痴戀巴士，而是在於他們展現對巴士的affection時，態度旁若無人，ㄧ如在地鐵車廂公然打車輪的情侶。
而public display of affection能否被人接受的關鍵，是閣下的樣子，即是美感。Let’s face it，巴膠並不是香港男人裡最睇得的一群。
但巴膠可能是香港男人裡最熱情、最唔收收埋埋的一群。
經常在想，巴膠的熱情，很大程度來自毒撚的毒性。因為不擅社交，巴膠的愛並不是經過調適的那種socially acceptable的愛，而是一種本能而原始的愛。
因為愛，令巴膠目中無人，因為愛，令巴膠甘願放棄自己的形象，和一切理性。巴膠的愛，既是毒撚的愛，也是令人窒息的真愛。
J.