很多人的銀包，好聽叫做百寶袋，唔好聽就叫垃圾桶。
五張以上唔同用途的信用卡、各種購物及食飯的單據、自己及別人的卡片、XXYY會員卡、舊戲飛、儲印花卡、Condom、好耐之前影的學生相、十年前XX同好會的會員卡等等，總之乜都可以係銀包搵到，除咗錢之外。
當然也不是没有錢，但本應是主角的銀紙，在這個脹爆的堆填區銀包裏，早就淪為不起眼的配角。原因也不難理解：畢竟返工出街不帶袋是常態，所以這些捨不得立即棄掉，但又無處可去的雞肋，就只好攝進本已經max capacity的銀包裏。
放入銀包也不是大錯，問題是，除了換銀包之外，根本没有人會得閒執銀包。於是乎，銀包就變成有入冇出的黑洞，無論是左右對摺的基本款，還是容量本應比較大的長銀包，最後都無一倖免，殊途同歸。
成呎厚的銀包，除了令人覺得你没有條理，好亂好多嘢之外，也不方便攜帶。銀包放褲袋時，像腫瘤般脹起，會破壞整體俐落、和諧、自然的線條。放褲後袋的話，坐得不舒適之餘，更會影響脊椎健康。
要解決垃圾桶銀包的問題，佬編建議採取「body changes your mind」的造法，簡單來說，就是透過換銀包，來改變唔執銀包與亂儲東西的壞習慣。
比較溫和的做法，是換一個slim wallet。傳統一點，會叫做"golfer's wallet"、"front pocket wallet"， 又或者直接叫card holder。
Card holder一般與銀包外觀無異，只是Size與容量縮細了，所以好處是依然好像有個「正正經經」的銀包，if that's your concern。
揀卡holder，不妨揀返啲designer brand，因為細細地、又唔貴，又叫做有啲品牌效應。Comme Des Carcons、Maison Margiela、Thom Brown，以至老牌子如BV、Burbery、Saint Laurent都有很多選擇。喜歡新潮一點的設計的話，Bellroy也相當不錯。
揀卡holder時，要思考兩個問題。第一，到底有幾多張卡係一定要每日帶？
不如佬編幫你數下。身份證、車牌、提款卡是必須，可能你是信用卡優惠達人，但請嘗試限制在兩張以內，再加一兩張會員卡等等，總共是六張卡，對card holders來說其實也有點多了，最好就再諗一諗，cut到四張。
第二，需唔需要放錢？
Yes，可能你會問：「梗係要，唔通唔帶錢出街呀？」但邊個話銀紙一定要擺銀包？分開擺除了令銀包更slim之外，其實也能分散風險。不過始終prefer一齊擺的話，就要注意card holder外面有没有間隔，方便攝銀紙。
分開擺的話，則有很多玩法，就咁一張張放褲袋又得，像黑幫般卷起一筒筒銀紙又得，還可以用銀紙夾，這點有機會再講。
老實說，在digital currency越來越流行的現在，很多時一天下來，行街睇戲食飯，都不需要拿銀包出來，全部電話搞得掂。所以，現在很多新品牌新設計，也在衝擊大家對銀包的想像。
例如Secrid、Machine era等品牌，就出了些叫做slim wallet、minimalist wallet的「銀包」。簡單而言，就是一個裝4-6張卡的小裝置，再加少量銀紙位。講個秘密你聽，佬編F與J都是slim wallet fans，數數手指，也用兩三年了。
F.