没有最黑暗，只有更黑暗。上次連Crocs都接受唔到的朋友，今次睇怕要先離開了，因為今日講的是「踩屎感拖鞋」。
所謂「踩屎感拖鞋」，原型可能是兩三年前推出的Yeezy Slide膠拖，很多品牌隨後也推出類似的款式，包括甚麼都有的淘寶。
屎拖由EVA膠一體成型，特點是厚底，以及外型較chunky。當然，講起chunky拖鞋，老潮童一定會想起00年代Edison帶起Visvim石膏鞋，屎拖的造型則更為簡約，淨色一大舊，簡單來說就是Yeezy的美學。
而因為鞋底為一大舊柔軟的eva膠，故又以踩屎為名。以往會聽人講：「好似踩住舊雲咁舒服」，現在變成了踩屎，Old Seafood講一句，真是一蟹不如一蟹。但無可否認，現在很多人現在喜歡越軟熟越好的腳感。
又或者，軟熟的厚鞋底本來就是一種毒品，著得越多，慢慢就回不去。以前就有講過，鞋底厚軟，可能會導致小腿肌肉弱化，著返薄底鞋時覺得不適，逐漸形成越軟越好的惡性循環。
除些之外，屎拖的鞋底，目測一般最少都有3cm，對於細粒女仔，又或者16x線下的男仔，有增高的作用。而且，簡約到近乎没有的款式設計，在casual wear的情況而言，的確是非常易襯。
眼見時下𡃁妹仔，個個踩住對屎拖，佬編難免感到好奇，所以也曾經試穿過。但可能個人升高，重心變了，而且腳底太柔軟，唔食力，行多兩步差啲仆街，拿拿聲換返對阿叔超薄人字拖，um，腳踏實地的感覺真好。
F.
延伸閱讀：