每個人的G點都不同，作為一個對意粉有執著的人，佬編看到田馥甄食意粉的相片，最憤慨的是：點解唔捲起嚟食！？
自古以來，真正意粉的正確食法只有一種：用叉挑起幾條麵，然後一邊迴轉一邊抽起，將長長的幾條麵條分離捲起，連醬汁一啖擺入口。
之所以捲起，一是因為要掛醬，二是要尊重和維護意粉的完整性，亦即所謂一條意粉的原則。反觀Hebe好似食乾炒牛河一樣，成抽意粉吊吊㧦，一來不掛醬，二來入口時容易彈到週圍都係，咁論盡豬，真係抵鬧＜3
也因為容易彈到週圍都係，有些人會用匙羹輔助，求其捲到咁上下，就用羹傍著送入口。但得罪講句，這是捲意粉技術不夠高超的證明，就像有些人夾小籠包用匙羹幫手一樣。
所以食開意粉的，能用叉捲起一束整齊的意粉，其中少少散開是正常，因為al dente的意粉本來應有一定彈性。亦因為麵條有彈性，所以意粉最好用有弧形的碟上，食的時候就能在碟邊稍稍借助地心吸力，將意粉捲得更好好。
當然，意粉也不一定只有一種食法。就如雲南米線來到香港會變質一樣，意粉來到香港，也有所謂的港式湯意，又或者焗雞扒意粉。對於這種意粉，你鍾意點食就點食，因為又浸又焗之後，意粉一般都像被摧殘完一樣，口感偏淋軟弱，夾硬捲起，反而容易折斷散開。
或者有人會話，食餐意粉姐，你理得我點食姐。但當意粉辱華成為事實，食得好好睇睇，就成為了義務。對不起傷害了你，但我正在食義大利麵，if you know you know。
F.
