French Press就好似月供ETF又或者飲熱水，明明好有效，卻被低估得好緊要。
每次同新識的朋友講起沖咖啡，唔知點解，大部份都會assume你用espresso machine，要不就是手沖，再然後是aeropress、虹吸式、moka pot。最後你忍唔住，答了一句：「哦我平時用french press沖㗎。」然後，話題終結，周圍靜晒。
講到底，只好怪French Press的設計太簡單，唔夠sexy。French Press的外型，基本上就是一個長型的水壺，再加一個金屬濾網。唔特別講聲的話，基本上一定會被阿婆阿嫲當茶壺用。
而且French Press用落也唔夠fancy。既唔需要鏗鏗敲兩下壓粉，冇espresso machine的隆隆聲；又唔洗隆重其事摺filter，然後拿長嘴壺畫符；更加不像虹吸式、moka pot，好像用bunsen burner做實驗一樣。French Press的基本流程，就是磨粉，沖熱水，然後等。
但如果你真的想自己沖一杯好好地嘅咖啡，French Press其實是最理性的選擇。
首先，其他沖咖啡方法，對技術有一定要求。又或者掉轉講，沖泡技術唔好，對咖啡的質素好大影響。例如espresso壓粉壓得唔好、手沖注水控制差，好容易就會破壞整杯咖啡的味道。Moka Pot更加唔好提，難用到痴線，都唔知邊part出事。
第二，技術是要花時間練的。除非你職業是沖咖啡，否則永遠都不會有足夠的練習機會，去沖一杯比較「職業」的咖啡。例如你要練壓粉，但自己沖自己飲，一日頂盡俾你沖夠四杯，練到幾時先稱得上熟手？
而French Press就没有上述的所有問題。點解？因為French Press跟本無技術可言，只有三個steps：磨粉，沖熱水，然後等。磨粉用機、熱水用煲、等用光陰，基本上已經將人為失誤的機會降至最低。所以French Press是最親民、最没有skill gap與knowledge gap的沖法。一壺在手，人人平等。
但不代表French Press不需要講究。正正是因為門檻低，所以才更易掌握到自己獨有的沖法。沖French Press只有四個varibles：磨粉的粗幼度、粉與水的比例、等的時間，以及stir or shake or others。
孫子兵法都有講：「味不過五、五味之變，不可勝嘗也。」四個variables，足有無窮可能。正因為French Press唔需要太多人手的技術，所以你反而可以將注意力放在這四個variables上，自由地探索屬於你的口味。
例如多粉就較濃、少粉較淡；磨幼啲味道更易出，但容易over-extract，而且口感可能會帶沙；時間長又濃返啲；完全唔stir唔shake，口感粗獷啲；唔撇油，口感豐盈啲。
記得大槪mark低每次的setting，然後細心品嚐下當中的分別。口味很個人的，但透過記錄與reflection，每次沖咖啡都會變成一個become better的過程，每一杯咖啡都會離你的完美咖啡更近。Keep it simple stupid，看似最簡單的東西，有時蘊含最多智慧。
***
未試過的朋友，可以參考這兩種最常見的沖法，然後慢慢調節：
最傳統的沖法
Grind size：coarse
ratio：1:12 (e.g. 30g咖啡：350g水）
水溫：92-95度
1. 磨粉
2. 落熱水
3. 等 4-5分鐘
4. press
5. 斟咖啡
Grind size：medium coarse
ratio：1:17
水溫：無講，當~95度
1. 磨粉
2. 落熱水
3. 等4分鐘
4. 撹散頂層浮面的粉，令粉失去張力而下沉，同時撇走層油脂
5. 再等5分鐘以上
6. press至掂到水邊就停
7. 斟咖啡
F.