Frankie一邊喝茶，一邊提出這個問題，「公司WFH咗大半年，太陽正常升起，一切運作如常，大家都慣晒啦，呢啲時候，唔係就應該WFH咩？一來一回，白白浪費車錢時間，好咩？」
「定啦你，宜家兩點半，睇個勢，轉個頭就會出email叫人走，不嬲都係咁。」Jason諗嘢比較practical 。「你執定嘢，諗定點樣返屋企最快好過啦。」
「唔係有冇得早走嘅問題。」Frankie突然嚴肅起來。「我唔係care嗰一日半日假，唔係介意洗唔洗做嘢，覺得冇效率，pointless。」
這些話當然有道理，但其實此刻Jason只想快快end topic，希望下晝早放之前，能做完手頭上的工作。「都係嘅，不過可能從來都冇乜期望，所以都冇特別失望。」
但Frankie一於少理，繼續講：「唔係囉，真係唔應該咁，不如我地同啊姐講。」「呢個唔係工作嘅問題，我返到屋企，一樣會做嘢，宜家係講緊公司需要改變。」
Jason沉默無語，因為已經估到下一句，果然，Frankie依然是一貫的free rider作風：「Jason，尤其你住咁遠，我覺得你要同啊姐講聲，叫佢早啲放你走。」
Jason早走，同team的Frankie自然順理成章走得。明明自己想走，偏要別人開口，這個如意算盤，怕且也打得太明顯，只有面皮夠厚的人，才會直接說出來。「過海又塞一塞，屯公又塞一塞，你再唔走，分分鐘今晚六點都未返到去。」Frankie越講越大聲。
話口未完，啊姐剛好經過聽到：「係喎，Jason你住得遠喎，快啲走喇，啲嘢翻去先做啦。」「Frankie，你都走啦，我哋個會re-schedule去聽日先開。」說罷，便急急腳走。
幸福來得太突然，Jason還有點迷惘，因為他一向搭地鐵，其實不經屯公，也不會塞車，但去到此時此刻，當然也懂得沉默執袋走人。說時遲那時快，離遠已經望到啊姐，挽袋輕盈離去，他好像突然明白了甚麼。
原來大家都想走，只是場戲一日未做完，一日都未走得住。真真假假，有時並不重要，最緊要是有個說法。Jason再望向Frankie的背影，只覺得特別偉大。
F.