很多人視夏天著長䄂衫，為一種無可避免的必要之惡：白領返工、見家長遮紋身、陪仔仔做入學試、皮薄怕曬。但其實只要選得好，長䄂裇衫不一定是種折磨。
夏天長䄂裇衫，首重透氣沁涼，要留意一點，輕薄不等於透氣，而不透氣的長䄂裇衫，例如一些人工纖維合成料，就算幾輕薄，都只會令你大汗搭細汗。其次考慮顏色及花紋，夏天著衫夠單調，返工冇得講，但casual shirt相對可以多一點玩味。
布料
裇衫來說，佬編首推訂造，因為計返開性價比最高，而且布料上選擇更多，想要透氣料不用自己左搵右搵。
視乎織法，cotton也可以很透氣，直接問師傅攞布料摸摸就可以。不怕皺的話，linen是相當好的選擇，又或者綿麻混紡的wool linen，中間拿個平衡。
佬編個人十分喜歡linen微皺的質感，一來「空氣感」更強，二來自以為瀟灑，香港冬天不冷，有時外面添衣，內𥚃照著linen shirt也不覺問題。純粹個人風格，有人就是喜歡裇衫筆直起角的幹練，也無妨。
科技日新月異，現在還有些新的技術或人工料也十分透氣，印象中Uniqlo Airism已經有短䄂裇衫款，可能以後有長䄂也說不定。先旨聲明，佬編也是Airism fans，但裇衫來說，還是prefer傳統透氣布料。
顏色
白／淺藍等百搭色自然不用多說，夏天著衫較單調，裇衫可以多少少顏色，例如淡綠、淺暗黃、淡藍紫。甚至可以試一些bold一點的撞色直間及花紋。深色暫不考慮，除非你是Saul Goodman，否則鮮色明亮的tone可免則免。
揀花紋上只要記一條法則：間條又好、格仔又好，花樣越粗越大，casual感就越重。又formal又casual的裇衫是不存在的，造裇衫時諗清楚用途，自然就識得揀。
F.