佬編中學時有位師兄，名字不記得了，只記得他從來唔帶書包返學。大部分課本，就這樣堆在他的座位上，放學直接去打機同踢波。
少量隨身物品，例如鎖匙銀包、通告回條、髪泥、港漫，他會用個啡色紙袋裝住，摺兩摺卷埋個開口，像橄欖球般夾在手臂間，爛咗就換另一個紙袋。在當年的佬編眼中，那個皺皮紙袋，型過晒當年時興的Laosmiddle、BGW、Mastermind。
這種永不妥協，絕不settle於一個正經袋的浪子形象，或多或少就影響了日後審美觀。如果真的有從師兄身上學懂了甚麼的話，那大槪就是明白了，原來瀟洒有型是種減法。
心水清的讀者可能即刻會問：「咁唔係唔戴袋先最瀟洒咩？」係，原則上無錯，但前提是不要塞到兩邊褲袋像腫瘤一樣脹起。脹起的褲袋，就像整容失敗的間尺鼻一樣，會破壞整體俐落、和諧、自然的線條。
如果你能夠控制自己，每日都只帶鎖匙銀包電話出街，可以將褲袋的隆起壓至無限接近零，fine，即管唔好帶袋出街。但以佬編自己為例，單是一個1L的水樽，就足以justify帶袋的理由，還有趕稿時要隨身帶的iPad、分隔公事與私事的第二部電話、以備不時之需的尿袋，以及實際上很少在街上看的書。
如果你也是這樣，那麼袋就不再是一個accessory，而是necessity。 所以真正的問題是，到底帶咩袋好？
文章開頭講的紙袋，畢竟是中學時期的產物，人大了，俾人見到你日日帶住個紙袋返工，始終有損形象。這種情況之下，環保袋可能就是the next best alternative，再sophisticated一點的說法，就是tote bag。（待續）
F.