裇衫，大部份白領打工仔每日必穿的衣服，說是第二層肌膚也不為過。在濕熱第一的香港夏天，基本上無人想著衫，而裇衫就是身上所剩無幾，其中一個可以花心思的地方。
或者正因如此，很多人對裇衫特別講究，他們未必個個都訂造過西裝，但每次討論裇衫時，都會同你講：「加少少，造裇衫啦，fit身好多㗎。」識貨的，還會加一句：「加多少少，去Ascot Chang造。」
對於這個答案，佬編不能同意更多。訂造的裇衫一定比較合身，而綜觀世界，Ascot Chang在造裇衫方面，都一定是top tier。所以有budget的話，一步到位是最優解。但這是否就代表，所有人都應該去造裇衫？又未必。
先解釋一下，造裇衫是一個甚麼槪念。正如西裝一樣，裇衫也可分直接購買的off the rack（OTR），以及度身訂造的made to measure（MTM）及bespoke。理論上，越高級，可因應身材尺寸特別調節的部份越多，選擇裇衫各項細節的自由度越大，價格也相對越昂貴。
訂造裇衫時，師傅會幫你度身，分析體型，細心一點的還會問你的生活習慣及偏好，例如錶戴哪隻手、頸部會否太緊。所以尺寸方面，不需太操心。但去到自由選擇的步驟，呵呵，就考你本身的知識及經驗了。
最基本的，是揀布料、領、cuff、fittings，再細緻一點，還可以有其他要求，包括要唔要pleat、要唔要胸袋、鈕門要唔要多一摺等等。在bespoke的世界裏，有無窮的可能性，誇張一點說，你想反轉件裇衫整都得。（p.s. 唔該唔好去Ascot Chang話佬訊教你整反轉嘅裇衫please。）
對於本身不太熟悉裇衫，甚至根本没有要求、没有興趣的人來說，太多選項，有時反而是種煩惱，甚至浪費。坦白講，與其花錢花時間去造裇衫，倒不如揀件最適合的OTR裇衫。
尺寸方面，除非是天賦異稟、骨格精奇，否則現在的裇衫，牌子款式尺寸多如繁星，要揀一件合身的應該不難。還可以即場摸、即場試身、即場買，這種現代的速度與便利，也是訂造裇衫所不能媲美的。
說真的，人生可以有很多目標，未必就要追求一件完美的裇衫。而且，買OTR裇衫其實也是一門學問。試得多，慢慢識分辨好壞，知道甚麼適合自己，開始有追求與諗法，才慢慢去造裇衫也不遲。唔使急㗎，一眾佬友前輩會等你。
F.