又要安心又要打針，出街消遣的意慾，變得越來越得低。有初接觸威士忌的朋友，send whiskey tasting的單張來，問佬編有冇興趣，諗兩諗，倒不如在家自己搞。
講明先，自己搞whiskey tasting，價錢未必比出面便宜。可能生意難做，現在有些whiskey tasting，象徵式收幾舊水就有六杯酒，非常抵飲。威士忌有平有貴，自己搞的話，當四個人夾四千，應該都只是掹掹緊買到六支酒。
而且去whiskey tasting，不單是為了飲酒，還可以聽talk、discount買酒、識新朋友。不過如果你像佬編一樣，買酒的速度快過飲的速度，又或者有一班朋友，可以每人帶幾支酒來聚會的話，自己搞whiskey tasting其實幾好玩。
準備時，要搞清楚參加者的level及preference。首先是酒量，正常而言，whiskey tasting講緊起碼五杯以上，以一個Glencairn聞香杯為例，每杯大約一隻手指闊左右，亦即常聽到的「a finger of whiskey」。
第二是酒的選擇，對於初心者而言，對威士忌未有太多槪念，應該為他們準備多一些不同風格的威士忌；而對於飲開的識途老馬，可以討論下，specific少少，就著某個主題來揀酒，例如同一風格、同一地方、同一年份，甚至同一個酒廠。
whiskey tasting最緊要是討論，所以佬編與一班飲開的朋友，會有一兩支大家都很熟悉的酒，作為benchmark，在比較與試味時，有common ground才更容易溝通。
一般而言，會由benchmark的酒開始飲，然後就順著由淡至濃、輕至重口味去飲。可能你會話，未飲過又點知？Well，這就是做host的責任了。一係上網睇tasting note，一係就全部自己先試一次。
當然還要準備小食，例如火腿芝士朱古力等，當然還有更重要的，是水。每人對酒精的接受能力都有些不同，可以根據個人喜好，在酒裏加一兩滴水。為此也可以準備個dropper，又或者簡單一點，一條飲管也可以。
最後要記得，酒量就像cow唔到的女一樣，很難捉摸，就算酒齡有返咁上下，有時都會出事。所以唔sure其他人酒量的話，飲完一round就要開始收埋啲酒，避免因為追酒飲而樂極生悲。始終是自己屋企，嘔到全屋都係就麻煩了。
F.
