Omakase又好，鐵板燒又好，一餐飯的好壞，不單止體現在食物質素上，其他食客的表現，有時也能令一餐幾千蚊的晚飯，變得業餘、不認真，和像馬戲團。
在香港食omakase或者鐵板燒，很多時都需要「搭枱」，與其他客人share同一個師傅。本來大家都是陌生人，只是剛好坐在同一張壽司枱，兩小時後就各散東西，零碎交流幾句就可以了。但大槪很多人天生不能接受dead air，又或者喜歡展示自己的社交能力，結果情況往往就像見工group interview時一樣，頭崩額裂爭取機會發言。
問題是，陌生人不同相熟朋友，很多時，我們都不會對陌生人表達反對的意見，而只會禮貌地認同。結果好好地一餐飯，往往會變成很尷尬的會考口語測驗：I agree with you，係呀，exactly，然後對話就淪為一堆無意義，有咁general得咁general的說話，白白浪費口水與聽力。
然後當講到冇嘢好講時，大家就會開始分享自己的奇妙美食心得，例句有：「我幾時幾時飲過支響17，嘩真係好正」、「識得食一定係食呢間，師傅真心好！」（順便吹奏師傅博佢俾大啖啲海膽）、「有冇去過日本乜乜市場食刺身」。可惜大家形容詞不夠，所以通常都只是瘋狂loop好食、好新鮮、好正等等飲食節目常見的詞彙。
但以上講的，還算是輕鬆的話題，極其量只是令情景變得有點可笑，還算是無傷大雅，還有一種佬編最怕的，是好勝心過剩，三唔識七都要自吹自擂的人。他們好像是對著師傳說話，卻總要得意洋洋大聲講，令全場都聽到他有幾「威」。不幸佬編早過了容易崇拜他人的年紀，本來想與朋友享受美食，到最後卻整晚聽著某某路人的威水史，既分心又irrelvant，就像聽soft jazz時隔離高唱國歌一樣，令人充份感受到，甚麼叫做食之無味。
結果食完一餐飯，食材有驚喜，連食客也有驚喜。有時夜欄人靜，不禁會反省一下，到底是誰的錯，抑或是自身性格缺陷，不夠包容呢？想來想去也想不出結果，不如都係留返開關先去食，起碼聽不懂日文，可以當背景音樂。
F.
