油麻地美都又執笠，網絡上喜喜洋洋，想必很多人都曾與美都有過一段難忘往事。佬編有幸食過不止一次，多少叫有點緣份，想在美都臨終（tbc）之前留句好說話，希望它從此正式走進歷史。
綜觀各留言區的精彩言論，美都主要有三宗罪：難食、唔抵、態度閪。比較客觀理性的，則會用「食環境」「食情懷」來形容。當然，一間餐廳要用「食環境」來形容，通常都不是好事，就好像追緊嘅女仔用好人來形容你一樣。
難食與否，百貨應百客，通常都比較主觀，尤其冰室、茶餐廳等，專造街坊生意，很多時但求就手解決溫飽，對味道的要求相對寬鬆。但美都的難食，似乎是難得跨越世代的共識。
印象最深是有次為了應酬，去做回頭客，叫個西多士以為冇死，食落卻像佬編中二家政堂時亂9炸的一樣，是充滿回憶的味道。佬編之後還去過幾次，每次都笑著勸朋友食多啲，然後叫杯熱檸水，靜靜享受老香港情懷足矣。
至於唔抵食方面，佬編以前讀過一個很啜核的形容，原句忘記了，內容大意是：「薄到好似法式田嫘嘅焗豬扒飯」。在美都，食餐便飯動輒破百，就像去M記豪食一樣，是種奢華的享受。
但學193話齋，好多cafe都係呃錢，美都作為食景食mood的老字號，價錢有一定程度的mark up，是非常合埋的事。而在豬肉佬都能以半塊俊臉上位的時代，餐廳以靚、情懷作為賣點，一賣一買，天經地義：你入嚟食係我的本事，點解要就你哋？
難得的是，美都上下的員工都擁抱這種態度，甚至將此推到極致，所以閪面是正常，唔俾影相是道理。很久以前，有記者找佬編做過小訪問，傾了半個小時左右，記者朋友想影幾張mood shot，咔嚓三四張，立即被老闆／待應屌出門口。
現在說可能會顯得很小氣，但真心，佬編其實對美都没有太多的恨，事後回想，反而覺得這種沙塵幾趣緻。原汁原味的香港情懷有價有市，作為香港人，理應感到驕傲。而單靠「舊香港」與旅遊客，也足以生存這麼多年，大槪印證了香港以前，的確是遍地黃金。
F.
樓下為當年的訪問圖片
